კურორტი ნუნისი გამორჩეულად ლამაზი და გამწვანებულია. ის ხარაგაულის რაიონში მდებარეობს და უახლოეს რკინიგზის სადგურ მოლითიდან 7 კილომეტრშია. სოფელ ნუნისს დიდი ხნის ისტორია აქვს. მისი აღმოჩენის შესახებ მრავალი ლეგენდა არსებობს. ერთ-ერთი მთავარი ლეგენდა დავით აღმაშენებლის სახელს უკავშირდება. ლეგენდის თანახმად, მეფე დავითი ბრძოლიდან ბრუნდებოდა. დაღლილ სახედრებს კანი მთლიანად გადატყაული ჰქონდათ, როდესაც პირუტყვები ნუნისის წყალში შესულან, ჩაწოლილან და დიდხანს ვერ აუყენებიათ. წყალს მათი დაწყულებული კანი მალე განუკურნავს. დავითს სოფელი მოსწონებია და იქ ეკლესიის აგება უბრძანებია.

ეკლესიიდან რამდენიმე კილომეტრის დაშორებით ტყის სიღრმეში მდებარეობს ადგილი, რომელსაც ,,ბერების კლდეს“ ეძახიან. მის კომპლექსში შედის კლდეში გამოკვეთილი სამი გამოქვაბული. ლეგენდის თანახმად ნუნისის ტაძარი ,,ბერების კლდეს“ საიდუმლო გვირაბით უკავშირდებოდა.

ამ სოფელთან დაკავშირებით უცნაური ლეგენდები არსებობს. ლეგენდას ნუნისის ბერების კლდის შესახებ, საფუძველი ჩაუყარა ე.წ. ,,იბერიონთა საძმო”-მ. ეს სოფელი არის მთიან რეგიონში და ლეგენდის თანახმად, ნოეს კიდობანი არის ერთ-ერთი მთა, ანუ, ნოეს კიდობანი არ ტივტივებდა წყალზე, ხალხი მხოლოდ იმის წყალობით გადარჩა, რომ კიდობანი (მთა, გამოქვაბული) დაიკეტა ჰერმეტიულად.

კოდობანში საძიებო სამუშაოების წარმოებისას ცხრა მეტრის სიღრმეზე აღმოჩნდა ლოდით ამოქოლილი შესასვლელი მიწისქვეშეთში, რომელიც, ,,იბერიონთა საძმოს“ მტკიცებით, წინაპართა დატოვებულ საიდუმლოს უნდა წარმოადგენდეს.

მათივე მტკიცებით, ნუნისი სამყაროს ცენტრია და ამ კლდის მიღმა დარბაზში დევს წიგნი, რომელიც სახარებაში ,,ლაზარედ“ არის მოხსენიებული და მზის შუქს ელოდება.

მთაში აღმოაჩინეს 13 ოთახი, რომელთაგანაც მხოლოდ 12 გახსნეს, ხოლო მე-13 არ გახსნეს, რადგან იქიდან სასტიკი კვნესა, კივილი და სხვა შემაძრწუნებელი ხმები ისმოდა, მკვლევარების მტკიცებით, სწორედ ეს მე-13 კარი იყო ჯოჯოხეთში ჩასასვლელი.

არსებობს სხვა ვერსიებიც, რომელთა მიხედვით ამ კლდეში ინახება უძველესი რელიქვია, რომელიც თამარ მეფის დავალებით ქათველებმა წმინდა მიწიდან წამოიღეს. ეს არის ერთერთი შუბი, რომლითაც ქრისტე განგმირეს, და მაცხოვრის სისხლმა შუბი სასწაულმოქმედი გახადა. სხვა ვერსიის თანახმად, აქ ინახება იმ ჯვრის ნაწილი, რომელზეც მაცხოვარი გააკრეს.

ასევე დამატებით იყო რამდენიმე ფაქტი, რომ ამ ზონაში კომპასი მიმართულებას არ აჩვენებდა და ფოტოები არ გამოდიოდა.

ექსპედიცია თავდაპირველად საქართველოს კათოლიკოს პატრიარქის ილია მეორის ლოცვა კურთხევით დაიწყო, თუმცა ბოლოს საპატრიარქომ დაგმო აღნიშნული ექსპედიცია და ეს საქმიანობა ერეტიკოსობად გამოაცხადა.

რამდენიმე წლის წინ გამოქვეყნდა ქართველი ეზოთერიკოსი მწერლის, გივი ალაზნისპირელის კვლევები, რომელიც ზემოთ აღნიშნულ თეორიებს ემხრობა და ამტკიცებს, რომ სოფელ ნუნისში არის ნოეს კიდობანი.

ტერიტორიის გამოსაკვლევად ჩამოსული იყვნენ ასევე გერმანელი მეცნიერები, თუმცა მათ გამოქვაბულის ჩაკეტილ ნაწილში შეღწევა ვერ შეძლეს. ამიტომ ჯერაც ბუნდოვანი რჩება ყოველივე ზემოთ ჩამოთვლილი მოსაზრება ლეგენდა და ვარაუდია, თუ არის რაიმე ფაქტი, რომელიც სიმართლეს შეესაბამება.