გიგი უგულავა „ფეისბუქ“ სტატუსით ფოთელებს მიმართავს. უგულავა წერს, რომ სრული შეგნებით აპირებს ფოთისა და ფოთელებისთვის ბრძოლას, დამოუკიდებლად იმისა გახდება თუ არა მერი.

„ამ ერთი თვის მანძილზე ბევრი რამ შეიცვალა ჩემში. ბევრ რამეს ახლებურად შევხედე. არც ჩემი აღფრთოვანებაა ადვილი, არც გაოცება და არც გაბრაზება, მაგრამ ყველაზე ძნელი და ჩემთვის აქამდე სრულიად წარმოუდგენელი იყო, რომ რაიმე ძალიან შემიყვარდებოდა. განვლილმა წლებმა და ციხეებმა მეგონა, რომ ეს გრძნობა საბოლოოდ დამაკარგვინა, მაგრამ ფოთმა ეს მოახერხა. შემიყვარდა ძალიან აქაურობა. კი ბატონო, ალბათ, აქაური არ გავხდი და ამას დრო სჭირდება-სიყვარული დროში უნდა გამოიბრძმიდოს, მაგრამ რასაც ახლა ვგრძნობ არის მარტივად გამოსათქმელი: მე სრული ჩემი შეგნებით ვაპირებ ფოთისა და ფოთელებისთვის ბრძოლას, დამოუკიდებლად იმისა გავხდები თუ არა მერი. ვიყო ფოთის მერი ეს უბრალოდ უკეთესი შესაძლებლობაა სწრაფად და ეფექტურად დავძრათ პრობლემები მკვდარი წერტილიდან - პორტი შემოვაბრუნოთ ქალაქისკენ, ხოლო ქალაქი ზღვისკენ. დავაბრუნოთ აქ ხალხი, გავაცოცხლოთ ქალაქი, შევქმნათ რეალური სამუშაო და საარსებო პირობები. ჩათვალეთ, რომ ფოთი ჩემი იდეა ფიქსია და ამიტომ არ მოგასვენებთ, არ მოგეშვებით სანამ ცვლილებებს, გაუმჯობესებას არ იგრძნობს თითოეული ფოთელი“ - წერს უგულავა.

მთავარი ფოტო: reginfo.ge