დღეს პარლამენტში რეგიონალური პოლიტიკისა და ინფრასტრუქტურის კომიტეტის სხდომა გაიმართა. სხდომაზე პარტია ,,მოქალაქეების" ერთ-ერთი ლიდერის, ლევან იოსელიანის შეკითხვა ეხებოდა პაციენტებისთვის სენსორული აპარატების შეძენას, რომელიც ჩხვლეტის გარეშე ზომავს სისხლში შაქრის შემცველობას და რომელიც განსაკუთრებით ბავშვებისთვის ძალიან მნიშვნელოვანია. დეპუტატთა შეკითხვებს საქართველოს ფინანსთა მინისტრის პირველი მოადგილე, გიორგი კაკაურიძე პასუხობდა. 

ლევან იოსელიანი: ,,ჯანდაცვის სამინისტროს მივმართე სადეპუტატო კითხვით და გამოვითხოვე ინფორმაცია სენსორული აპარატის შესახებ, რომელიც ჩხვლეტის გარეშე ზომავს სისხლში შაქრის შემცველობას, ეს ძალიან ბევრ მშობელს აწუხებს, განსაკუთრებით ბავშვებში პრობლემურია ეს საკითხი, რადგან დღეში რამდენჯერმე უწევთ შაქრის გაზომვა და ეს იწვევს ბავშვების სტრესში ჩაგდებას, როდესაც ყოველ ჯერზე ხდება ჩხვლეტა. მე მითხრეს, რომ ასეთი აპარატების შესაძენად ბიუჯეტში არის თანხა გათვალისწინებული, ოღონდ ბიუჯეტს რომ გადავხედე, მე ვერ ვნახე, შეიძლება მე ვერ აღმოვაჩინე, ან რომელიმე პროგრამულ ნაწილში არის გათვალისწინებული. გთხოვთ, მეტი სიცხადე რომ შეიტანოთ ამ ნაწილზე, სად არის ეს თანხა გათვალისწინებული, რომ ასეთი სენსორული აპარატების შეძენა მოხდეს, რომ ეს საკითხი ერთხელ და სამუდამოდ მოგვარდეს ჩვენს ქვეყანაში“.

,,ქართული ოცნების“ წარმომადგენლის, ირაკლი ზარქუას განცხადებით, აღნიშნული პროგრამა მომავალი წლის პირველი იანვრიდან ამუშავდება.

,,ძალიან მნიშვნელოვანი თემაა, ჩვენი საზოგადოების ძალიან მნიშვნელოვან ნაწილს აწუხებს, დაახლოებით 1300 ბავშვზეა საუბარი, გუშინ გვქონდა კომუნიკაცია სამინისტროსთან და მომავალი წლის პირველი იანვრიდან ეს პროგრამა ამუშავდება. ფინანსთა სამინისტროში მეორედ როცა შემოვა ბიუჯეტი ეს სავარაუდოდ იქ უკვე იქნება ასახული“ _ განაცხადა ირაკლი ზარქუამ.

საქართველოს ფინანსთა მინისტრის პირველი მოადგილის, გიორგი კაკაურიძის განცხადებით, აღნიშნული აპარატების შესაძენად ხარჯების გადათვლა მოხდება და ახლო მომავალში  დიაბეტის მართვის პროგრამაში იქნება ასახული.

,,დიაბეტის მართვის პროგრამა, რომელიც წლევანდელთან შედარებით უკვე გაზრდილია, თუმცა ჩვენ სამინისტროსთან გვაქვს დამატებითი კომუნიკაცია, რადგან თავიდან მოთხოვნა რაც იყო, დათვლილი იყო საცალო შესყიდვის ფასი, რაც მნიშვნელოვნად შეიძლება განსხვავდებოდეს ერთიანი შესყიდვის შემთხვევაში. ამიტომ ვმუშაობთ სამინისტროსთან, ვნახავთ რა შესაძლებლობა იქნება და რა მოცულობის ეკონომია შეიძლება შესყიდვის პროცესში გვქონდეს და საბოლოოდ ამის მიხედვით დიაბეტის მართვის პროგრამაში იქნება ამისი თანხაც ასახული“ _ განაცხადა გიორგი კაკაურიძემ.