ექსპერტი ვახტანგ ძაბირაძე ჯანდაცვის მინისტრის თანამდებობიდან გადადგომას მასსა და პრემიერ-მინისტრს შორის შესაძლო დაპირისპირებას უკავშირებს. ძაბირაძემ “ინტერპრესნიუსთან” საუბარში ვარაუდი გამოთქვა, რომ სავარაუდოდ, ეს გადაწყვეტილება პრემიერმა ბიძინა ივანიშვილთან შეათანხმა.

„საკმაოდ მძიმე ურთიერთობა იყო პრემიერსა და ტიკარაძეს შორის. ეს დაპირისპირება ბევრისთვის ცნობილი იყო. სავარაუდოდ, მათ შორის კონფლიქტი კოვიდ პასპორტთან დაკავშირებული საკითხის გამო დაიწყო. ალბათ, პირველ ეტაპზე, პრემიერმა მისი გადაყენება ვერ შეძლო, ხოლო ახლა უკვე ისეთი ვითარება შეიქმნა, რომ პრემიერმა ასეთი გადაწყვეტილება მიიღო და შეათანხმა იმასთან, ვინც საერთოდ მინისტრებს ნიშნავს. ვგულისხმობ ბიძინა ივანიშვილს. ღარიბაშვილი ხომ მინისტრებს არ ნიშნავს. არც ერთ პრემიერს თავისი გუნდი არ ჰყოლია. პრემიერადაც ივანიშვილის რეკომენდაციით დაინიშნა. ტიკარაძეს მოუძებნეს „თბილი ადგილი“, სულ არ გაუშვეს, პოლიტსაბჭოში დატოვეს. ჯანდაცვის მინისტრი როცა იყო, არაფერი დასამახსოვრებელი არ გაუკეთებია. განცხადება რომ პოლიტსაბჭოში გაუწევს კურირებას ჯანდაცვას და იქიდან მიხედავს, ეს ხომ ბლეფია. მისი გადაყენების თაობაზე გადაწყვეტილებას პრემიერი არ იღებს, პრემიერმა შეიძლება შუამდგომლობით მიმართოს ივანიშვილს. მშვენივრად ვიცით, რომ ტიკარაძე ივანიშვილისა და მის ოჯახის პროტეჟე იყო, ასევე პრემიერიც ივანიშვილის პროტეჟეა. ამიტომ, უნდა შეეთანხმებინა. როცა შეთანხმება შედგა, უთხრეს, უნდა გადადგე.

3 წელი მინისტრი იყო და მოსახლეობას რომ ჰკითხო, რა რეფორმა გაატარა ტიკარაძემ ან რა შედეგი ჰქონდა მის საქმიანობას, ვერაფერს გეტყვიან. მე ვერაფერს დავასახელებ, გულწრფელად გეუბნებით. ძალიან მაინტერესებს, მისი მინისტრობის შედეგი რა იყო. რა გაუმჯობესდა მოსახლეობისთვის. თუ ვინმე ამას მეტყვის, მაშინ ვიტყვი, რომ კი ბატონო, ვცდები, თუმცა, მისი საქმიანობის წარმატება რაში მდგომარეობს არ ვიცი, მე ამას ვერ ვხედავ. პირიქით შეიძლება ითქვას, ვითარება გაცილებით დამძიმდა, არაფერს ვამბობ ჯანდაცვის სექტორში მომსახურებაზე, დაფინანსებაზე, მედიკამენტების ფასებზე და ა.შ. მინისტრი იყო და ჯანდაცვის სამინისტროს თავისი ხელი ვერ დაატყო პარტიის პოლიტსაბჭოდან რამეს კურირებას გაუწევს?!“ - განაცხადა ვახტანგ ძაბირაძემ.

მთავარი ფოტო: alia.ge