პროკურატურის ცნობით, ქმრის მიერ მოკლულ ორსულ ქალს სხეულის სხვადასხვა არეში ოცდაათამდე ჭრილობა ქონდა მიყენებული
ბრალდებულმა განზრახ მოკვლის მიზნით, დანით ორსულ მეუღლეს განსაკუთრებული სისასტიკით, სხეულის სხვადასხვა არეში ოცდაათამდე ჭრილობა მიაყენა. ამ ინფორმაციას საქართველოს პროკურატურა 22 დეკემბერს თბილისში მომხდარ მკვლელობასთან დაკავშირებით ავრცელებს.
უწყების ცნობით, განსაკუთრებული სისასტიკით ორსული მეუღლის განზრახ მკვლელობისთვის დაკავებულს ბრალდება წარედგინა.
,,შინაგან საქმეთა სამინისტროს მიერ ჩატარებული გამოძიებით დადგინდა, რომ 22 დეკემბერს, თბილისში, ბრალდებულმა განზრახ მოკვლის მიზნით, დანით ორსულ მეუღლეს განსაკუთრებული სისასტიკით, სხეულის სხვადასხვა არეში ოცდაათამდე ჭრილობა მიაყენა. მიყენებული დაზიანებების შედეგად დაზარალებული შემთხვევის ადგილზე გარდაიცვალა.
სამართალდამცველებმა ბრალდებული იმავე დღეს დააკავეს. მას ბრალდება საქართველოს სისხლის სამართლის კოდექსის 111,109-ე მუხლის მე-2 ნაწილის „ა“ და „ვ“ ქვეპუნქტებით და მესამე ნაწილის „ბ“ ქვეპუნქტით (განზრახ მკვლელობა, დამნაშავისთვის წინასწარი შეცნობით ორსული ქალის, ოჯახის წევრის მიმართ, ჩადენილი განსაკუთრებული სისასტიკით) წარედგინა, რაც სასჯელის სახედ და ზომად 16 წლიდან 20 წლამდე ან უვადო თავისუფლების აღკვეთას ითვალისწინებს.
პროკურატურა ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით სასამართლოს კანონით დადგენილ ვადაში მიმართავს.
სისხლის სამართლის საქმეზე გამოძიება გრძელდება. გამოძიების ფარგლებში ჩატარდება ყველა საჭირო საგამოძიებო და საპროცესო მოქმედებები. ასევე დაინიშნება ფსიქიატრიული ექსპერტიზა, რომელიც დანაშაულის ჩადენის დროს ბრალდებულის ფსიქიკურ მდგომარეობას შეისწავლის“ _ აღნიშნულია უწყების განცხადებაში.
შეგახსენებთ, გუშინ, 22 დეკემბერს ვარკეთილში ახალგაზრდა კაცმა ხუთი თვის ორსული ცოლი 1 წლის შვილის თვალწინ მოკლა. 22 წლის ქეთა კეპულაძეს ქმარმა, 23 წლის გოგა გზირიშვილმა ჭრილობები ცივი იარაღით მიაყენა. როგორც ადგილობრივები ამბობენ, მამაკაცს ფსიქიკური ჯანმრთელობის პრობლემები ჰქონდა.
