საქართველოს პარლამენტში ჯანდაცვის მინისტრი ზურაბ აზარაშვილი მივიდა. დეპუტატებმა მას ,,მინისტრის საათის“ ფორმატში მოუსმინეს, რის შემდეგაც მინისტრმა მათ შეკითხვებს უპასუხა.

ლევან იოსელიანის კითხვა ონკოლოგიური პაციენტების დაფინანსებას შეეხებოდა. მისი განცხადებით, 18-დან 60 წლამდე პაციენტებს სახელმწიფო პროგრამა სრულად არ აფინანსებს და მათ საკმაოდ დიდი თანხის გადახდა უწევთ. იოსელიანის კითხვაზე, გეგმავს თუ არა სამინისტრო, რომ სახელმწიფო პროგრამა ყველა ასაკობრივი ჯგუფისთვის იყოს ხელმისაწვდომი, აზარაშვილმა უპასუხა, რომ პაციენტები, რომლებიც სამინისტროს მიმართავენ რეფერალის ფარგლებში, სამინისტრო მათ მკურნალობას აფინანსებს. მისივე განცხადებით, აღნიშნული საკითხის საყოველთაო ჯანდაცვაში ინტეგრირებაზე სამინისტრო მუშაობს.

,,ონკოლოგიური დაავადებების სახელმწიფო პროგრამა, რამდენადაც ჩემთვის ცნობილია, არ არის ერთიანი, ეს პროგრამა აფინანსებს გარკვეული კატეგორიის ადამიანებს,18 წლამდე და 60 წლის ზემოთ პაციენტებს, ხოლო 18-დან 60 წლამდე პაციენტებს სახელმწიფო პროგრამა სრულად არ აფინანსებს და მათ საკმაოდ დიდი თანხის გადახდა უწევთ. გეგმავს თუ არა სამინისტრო, რომ სახელმწიფო პროგრამა ყველა ასაკობრივი ჯგუფისთვის იყოს ხელმისაწვდომი?“ _ იკითხა იოსელიანმა, რაზეც მინისტრმა უპასუხა:

,,საყოველთაო ჯანდაცვაში 40 000 ლარზე ზევით შემოსავლის მქონე პირებში ნაკლები დაფინანსებაა, მაგრამ იმ შემთხვევაში, თუ ჩვენ მოგვმართავენ განცხადებით რეფერალის ფარგლებში, მომართვების 100%-ს ვაფინანსებთ და ეს საკმაოდ დიდი თანხებია, დაახლოებით 60 მილიონ ლარზე მეტია წინა წლის დაფინანსებული და ვფიქრობთ, რომ სრულად ვფარავთ, მაგრამ თუ შეგვიძლია, რომ საყოველთაოში იყოს, ადამიანი არ უნდა იყოს დამოკიდებული განაცხადის გაკეთებაზე და უნდა იცოდეს, რომ ეს ფინანსდება. ამ საკითხსაც ვიხილავთ, როგორ შეიძლება მაქსიმალურად ამის ინტეგრირება საყოველთაო ჯანდაცვაში. ონკოლოგიის დიაგნოსტიკის ნაწილში არ ვაფინანსებთ და უკვე ამის განხილვაც ხდება, რომ საყოველთაო ჯანდაცვის პროგრამაში ჩავრთოთ“ _ აღნიშნა ზურაბ აზარაშვილმა.