იურიდიულ საკითხთა კომიტეტმა პირველი მოსმენისთვის განიხილა სამოქალაქო კოდექსში შესატანი ცვლილება, რომელიც მარტოხელა მშობლის ტერმინის განმარტების ცვლილებას ითვალისწინებს. კანონპროექტის თანახმად, მარტოხელა მშობელი არის პირი: რომელსაც ჰყავს 18 წლამდე ასაკის შვილი ან შვილად აყვანილი 18 წლამდე ასაკის ბავშვი, თუ ბავშვის დაბადების აქტის ჩანაწერში არ არის შეტანილი ჩანაწერი ბავშვის მეორე მშობლის შესახებ; თუკი მისი არასრულწლოვანი შვილის მეორე მშობელი გარდაცვლილია, გამოცხადებულია გარდაცვლილად ან აღიარებულია უგზო-უკვლოდ დაკარგულად; ან თუ მას ჩამორთმეული აქვს მშობლის ყველა უფლება და მოვალეობა.

სამოქალაქო კოდექსში შესატან ცვლილებებთან დაკავშირებით, ,,მოქალაქეების“ წარმომადგენელმა ქეთი თურაზაშვილმა განაცხადა, რომ ინიციატივაში არ არის იმ პირთა სრული ჩამონათვალი, ვისაც მარტოხელა მშობლის სტატუსი ეკუთვნის. მისი თქმით, ამ ჩამონათვალს უნდა დაემატოს ის პირები, რომლებიც განქორწინების შედეგად დარჩნენ მარტო, ასევე, როგორც იგი აღნიშნავს, ყველა მარტოხელა მშობლის სტატუსის ბენეფიტებით უნდა ისარგებლონ იმ ოჯახებმაც, სადაც მშობლების გარდაცვალების შემდგომ არასრულწლოვნებზე ბებია-ბაბუები ზრუნავენ.

,,ვფიქრობ ამ ინიციატივაში არ არის იმ პირთა სრული ჩამონათვალი, ვისაც რეალურად უნდა ჰქონდეს მარტოხელა მშობლის სტატუსი. მაინტერესებს, ხომ არ აპირებთ გაითვალისწინოთ ის ადამიანებიც, ვინც განქორწინების შედეგად დარჩა მარტო და განქორწინებული მეორე მეუღლე არანაირ მონაწილეობას არ იღებს. სამწუხაროდ, არის შემთხვევები, როდესაც სასამართლოს მიერ დაკისრებული ალიმენტის მიუხედავად, მაინც ახერხებენ შემოსავლების დამალვას და ერთ-ერთი მეუღლე, რომელთანაც არიან შვილები ყველა გამოწვევის წინაშე მარტო რჩება. ასევე, სამწუხაროდ გვაქვს შემთხვევები, როდესაც მშობლების გარდაცვალების შემდგომ ბებია-ბაბუებს, რომლებიც ზრდიან შვილიშვილებს, ყველა საჭიროების მოძიება თავად უწევთ.

ასევე მაინტერესებს, სტატუსის მინიჭებით რა ბენეფიტებს იღებენ ეს ადამიანები. ცვლილებებში გვაქვს გათვალისწინებული, რომ ადამიანი, რომელსაც გარდაეცვალა მეუღლე და ზრდის არასრულწლოვან შვილებს, მას მიენიჭება მარტოხელა მშობლის სტატუსი, მაგრამ რა ბენეფიტებს მიიღებს ის ამ შემთხვევაში?“ _ მიმართა ქეთი თურაზაშვილმა კანონპროექტის წარმდგენებს.

საშემოსავლო გადასახადით არ იბეგრება მარტოხელა დედის მიერ კალენდარული წლის განმავლობაში მიღებული დასაბეგრი შემოსავალი 3000 ლარამდე. საგადასახადო კოდექსში შესატანი ცვლილების მიხედვით კი, აღნიშნული შეღავათი მარტოხელა მამებსაც შეეხებათ. ქეთი თურაზაშვილის განცხადებით, უმჯობესი იქნება თუ საშეღავათო თანხა 3 000 ლარიდან  5 000 ლარამდე გაიზრდება და მშობლებს, რომელთა წლიური შემოსავალი 5 000 ლარამდეა, საშემოსავლო გადასახადზე შეღავათი ექნებათ.

,,რადგან ცვლილება შედის და გაუმჯობესებაზე ვმუშაობთ, 3 000 ლარიან შეღავათს, ხომ არ ჯობია, რომ ამ თანხის გაზრდაზეც ვიფიროთ და ვისი წლიური შემოსავალიც 5 000 ლარია, მათაც შეეხოს ეს შეღავათი" _ მიმართა ქეთი თურაზაშვილმა კომიტეტის წევრებს.

ამასთან დაკავშირებით კომიტეტის წევრმა რატი იონათამიშვილმა განაცხადა, რომ ზოგადად 82-ე მუხლის ჩანაწერი ვერ პასუხობს დღევანდელ გამოწვევებს, თუმცა, მისი თქმით, ამ ეტაპზე ამ ცვლილების შესაძლებლობა არ არის. როგორც იონათამიშვილმა განაცხადა, აღნიშნული ცვლილება მოკლე დროში ვერ განხორციელდება, თუმცა შესაძლებლობიდან გამომდინარე ამის გადახედვა მოხდება.