არავის აქვს საფუძველი იმის თქმის, რომ ქვეყანაში რაღაც დრამატული სცენარები ვითარდება. ამის შესახებ ადამიანის უფლებათა დაცვის კომიტეტის თავმჯდომარემ მიხიელ სარჯველაძემ საქართველოში რუსეთის მოქალაქეების შემოსვლასთან დაკავშირებით განაცხადა. იგი მიიჩნევს, რომ ოპოზიციის ნაწილი საზოგადოებაში ქსენოფობიური ნიადაგის გაღვივებას ცდილობს.
,,საუბარი იმაზე, რომ სახელმწიფო უსაფრთხოების სამსახურმა წარადგინოს საქართველოში შემოსული ტურისტების რაოდენობა, რა საკვირველია, არასწორია. არავის აქვს საფუძველი იმის თქმის, რომ ქვეყანაში რაღაც დრამატული სცენარები ვითარდება. მანიპულაციის მცდელობაა, როცა არ არის ახსნილი ის, თუ რამდენმა ტურისტმა დატოვა ქვეყანა, რა კატეგორიის ტურისტები არიან და ა.შ. ცდილობენ, რომ ამ შემთხვევაში გააღვივონ ჰომოფობიური ნიადაგი. ეს ძალიან მავნე ტენდენცია შეიძლება, იყოს და ამისგან ყველამ თავი უნდა შეიკავოს.
საზოგადოება შეცდომაში არ უნდა იყოს შეყვანილი და ქსენოფობია არ უნდა გაღვივდეს. არ შეიძლება, კონფლიქტები ვასაზრდოოთ და საზოგადოებაში კონფლიქტები არ უნდა დაიბადოს. ქსენოფობისთვის ცივილიზებულ სამყაროში ადგილი არ არის. მთავარი მანკიერი ტენდენცია, რომელიც დანახულია და ღმერთმა ქნას გვეშლებოდეს, ეს არის მცდელობა იმის, რომ ამ შემთხვევაში, სახელმწიფოში გააღვივონ ქსენოფობიური განწყობები, რაც არის სამწუხარო. თუ, მაგალითად, მაღაზიაში ადამიანს ქართულად არ ელაპარაკებიან, ეს არის კონკრეტული დარღვევა, ამას სჭირდება რეაგირება. თუ სადმე რამე დარღვევას ადგილი აქვს, ამას რეაგირება და სამართლებრივი შედეგი უნდა მოჰყვეს, მაგრამ ეს არ ნიშნავს, რომ ამასთან საბრძოლველად საზოგადოებაში ჰომოფობიური და დისკრიმინაციული განწყობები გავაღვივოთ“ _ განაცხადა მიხიელ სარჯველაძემ.
