პარლამენტს განსახილველად წარედგინა ,,მუზეუმის შესახებ“ კანონპროექტი, რომელიც საქართველოში სამხედრო ტიპის მუზეუმის შექმნას ითვალისწინებს. როგორც კანონპროექტის განმარტებით ბარათშია აღნიშნული, ევროკავშირის წევრი ქვეყნების უმეტესობაში, ამერიკის შეერთებულ შტატებსა და დიდ ბრიტანეთში შექმნილია ეროვნული სამხედრო მუზეუმები, რომელთაც მნიშვნელოვანი ფუნქციური დატვირთვა აქვთ.

,,ეროვნული სამხედრო მუზეუმის დაფუძნება ძალიან მნიშვნელოვანია არა მხოლოდ სამხედრო ისტორიით, სამხედრო ტექნიკით და შეიარაღებით დაინტერესებული საზოგადოებისათვის, არამედ ამ სახის მუზეუმებს მნიშვნელოვანი როლი აქვს მომავალი თაობების პატრიოტული აღზრდისათვის და ცნობიერების ამაღლებისათვის. ამასთანავე, მომავალში სამხედრო ტიპის მუზეუმი აკადემიური წრეებისთვისაც მნიშვნელოვანი საინფორმაციო წყარო გახდება“ _ ნათქვამია განმარტებით ბარათში.

კანონპროექტის ინიციატორები არიან დეპუტატები: ელისო ბოლქვაძე, ალექსანდრე ელისაშვილი, ვლადიმერ ჩაჩიბაია, ირაკლი ბერაია, ალექსანდრე ტაბატაძე, გიორგი ხელაშვილი დარესან კონცელიძე.

კანონპროექტი 2025 წლის 1-ელი იანვრიდან შევა ძალაში.

წარდგენილი დაანგარიშების თანახმად, სამხედრო მუზეუმის შექმნისთვის, მისი შენობაში და ღია სივრცეში განთავსებისთვის საჭირო ხარჯის სავარაუდო ღირებულება 23 753 112 ლარს შეადგენს.