,,მოქალაქეების“ ლიდერი ალეკო ელისაშვილი ,,ნაციონალური მოძრაობის“ მიერ ვადამდელი არჩევნების მოთხოვნას არასერიოზულს უწოდებს და ამბობს, რომ ეს ამომრჩევლის იმედგაცრუებას და ,,ქართული ოცნების“ ხელისუფლებაში ყოფნის გახანგრძლივებას გამოიწვევს.

როგორც ელისაშვილი აღნიშნავს, აუცილებელია მოხდეს ,,ქართული ოცნების“ ჩანაცვლება, მაგრამ ეს ჩანაცვლება უნდა იყოს კოალიციური და არ უნდა იყოს ერთპარტიული.

,,დღეს რაც მოვისმინეთ ,,ნაციონალური მოძრაობისგან“, ძალიან არასერიოზულია, რაც სინამდვილეში ორ რამეს იწვევს: ერთი, ამომრჩევლების ფრუსტრაციას და იმედგაცრუებას და მეორე, ,,ქართული ოცნების“ ხელისუფლებაში ყოფნის გახანგრძლივებას. ვადამდელ არჩევნებს ახლა რომ ითხოვ, დავუშვათ ჩატარდა გაზაფხულზე, წელიწადნახევრიან პარლამენტს ვირჩევთ? თუ ერთ წლიანს? 2024 წელს ჩვენ კონსტიტუციაში გვიწერია, რომ უნდა ჩატარდეს საპარლამენტო არჩევვნები, რომელიც უნდა იყოს სრულად პროპორციული. ახლა რომ რიგგარეშე არჩევნები ჩაინიშნოს, რა სისტემით ჩატარდება? 120/30-ზე, ანუ 30 მაჟორიტარი ისევ დარჩება, რისთვისაც ვიბრძოდით იმის საპირისპიროს ვითხოვთ? ახლა რაზეც უნდა ვიბრძოლოთ, ეს არის ბარიერის დაწევა, 5%-დან ქვემოთ, რომ მივიღოთ ნორმალური, მრავალპარტიული პარლამენტი. და ამ დროს ,,ნაციონალური მოძრაობა“ ითხოვს რიგგარეშე არჩევნებს, ანუ ერთწლიან პარლამენტს და ,,ქართულ ოცნებას“ 30 მანდატი უკვე ჯიბეში ექნება ჩადებული.

ჩვენი ქვეყნის მომავალი არის კოალიციურობა, ვიღაცას შეიძლება მოსწონს, ვიღაცას არ მოსწონს, მაგრამ ეს არის ჩვენი მომავალი. პარლამენტი აღარ იქნება ერთპარტიული, ,,ნაციონალურ მოძრაობას“ აქვს ამაო მოლოდინი, რომ მოუგებს ,,ქართულ ოცნებას“ და სრულად ჩაანაცვლებს მას. აუცილებელია მოხდეს ,,ქართული ოცნების“ ჩანაცვლება, მაგრამ ეს უნდა იყოს კოალიციური ჩანაცვლება და არა ერთპარტიული. არ მესმის იმ პოლიტიკოსების, ვინც ამას თვალს არ უსწორებს. ვადამდელი არჩევნების მოთხოვნას და შემდეგ ისევ იმედგაცრუებას, რეალურ რაღაცეებზე რომ გავაკეთოთ კონცენტრაცია არ ჯობია? თუ ვინმე ძლიერდება ამ არასერიოზული მოთხოვნებით, ეს ,,ქართული ოცნებაა“ _ განაცხადა ალეკო ელისაშვილმა.