,,მოქალაქეების“ წარმომადგენელმა, ლევან იოსელიანმა საპროცედურო კომიტეტის სხდომაზე განსახილველად კანონპროექტი ,,საქართველოს პარლამენტის რეგლამენტში ცვლილებების შეტანის შესახებ“ წარადგინა. კერძოდ, პარლამენტის რეგლამენტის 204-ე მუხლის მე-5 პუნქტში იმ თანამდებობის პირთა ჩამონათვალს, რომელთა არჩევისას კენჭისყრა ფარულია, სახალხო დამცველი გამოაკლდება, რაც გულისხმობს, რომ პარლამეტის მიერ საქართველოს სახალხო დამცველის არჩევისას კენჭისყრა გახდება ღია. კომიტეტმა ინიციატივას პირველი მოსმენით მხარი დაუჭირა.

ინიციატივის წარმდგენის, ლევან იოსელიანის განმარტებით, აღნიშნული ცვლილება საშუალებას მისცემს საზოგადოებას, თვალი მიადევნოს პარლამენტის წევრთა გადაწყვეტილების თანმიმდევრულობას კენჭისყრის შედეგების მიხედვით და ხელს შეუწყობს იმას, რომ როგორც სახალხო დამცველის შერჩევის, ასევე უშუალოდ არჩევის პროცედურაც წარიმართოს ინკლუზიურად. მისივე თქმით, კენჭისყრის ღიაობა პროცესს ფარული გარიგებებისგან დაიცავს.

როგორც იოსელიანმა ასევე აღნიშნა, ევროკავშირის კანდიდატი ქვეყნის სტატუსის მიღების ერთ-ერთ წინაპირობას სახალხო დამცველის არჩევის გამჭვირვალე პროცედურის უზრუნველყოფა და დამოუკიდებელი კანდიდატის არჩევა წარმოადგენს. იგი გამოდის ინიციატივით, რომ პარლამენტის რეგლამენტის პროექტი განხილული და მიღებული იყოს დაჩქარებული წესით, რათა სახალხო დამცველის არჩევის დროისათვის შექმნილი იყოს შესაბამისი სამართლებრივი საფუძველი.

,,სახალხო დამცველის არჩევის წესში ჩვენ დავაინიცირეთ ცვლილებები, რომელიც გულისხმობს ამ წესის ფარულობის გაუქმებას და ღიაობის პრინციპის შემოტანას. აღნიშნული ცვლილება საშუალებას მისცემს საზოგადოებას, თვალი მიადევნოს პარლამენტის წევრთა გადაწყვეტილების თანმიმდევრულობას კენჭისყრის შედეგების მიხედვით. ხელს შეუწყობს, რომ როგორც სახალხო დამცველის შერჩევის, ასევე უშუალოდ არჩევის პროცედურაც წარიმართოს ინკლუზიურად.

არცერთ ევროპულ ქვეყანაში, სადაც პარლამენტი ირჩევს სახალხო დამცველს, არ არის ეს პროცესი დახურული და საზოგადოებამ იცის, რომელი პოლიტიკოსი ვის უჭერს მხარს. ერთადერთი ქვეყანა, სადაც დღემდე დახურული რჩება სახალხო დამცველის არჩევის წესი, ეს არის რუსეთის ფედერაცია და საქართველო. ვფიქრობ, რომ ჩვენ ახლა საუკეთესო მაგალითი გვაქვს და უნდა მივბაძოთ ამ მაგალითს. საერთაშორისო კონტექსტის გარდა, მნიშვნელოვანია შიდა პოლიტიკური კონტექსტი და შიდა პოლიტიკური კონტექსტი გვეუბნება, რომ მაშინ, როდესაც სულ რამდენიმე ხმა არის საჭირო, რომ სახალხო დამცველი აირჩეს, ოპოზიციის შიგნით ყველას პოზიცია უნდა იყოს საჯაროდ ცნობილი, რომ მერე არ მოხდეს გადაწყვეტილების მიღება და შემდგომში ამის გადაბრალება სხვა ადამიანებზე. საზოგადოება ვერასოდეს გაიგებს, რეალურად ვინ ვის დაუჭირა მხარი. საპროცედურო კომიტეტმა მიიღო გადაწყვეტილება, მხარი დაუჭირა ჩემს ინიციატივას და ამ კვირაში ვგეგმავთ, რომ დავასრულოთ ეს პროცესი, რომელიც დაჩქარებული წესით არის გამოტანილი“ _ განაცხადა ლევან იოსელიანმა.