,,ქართული ოცნების“ თავმჯდომარის ირაკლი კობახიძის განცხადებით, თუ დავუშვებთ, რომ ზურაბიშვილმა შეიძლება ნიკა გვარამია შეიწყალოს, გამოდის, რომ პრეზიდენტის ინსტიტუტს პატივს არ სცემს. ირაკლი კობახიძე საზოგადოებას შეახსენებს, თუ რა სიტყვებით მოიხსენიებდა გვარამია პრეზიდენტს - მისი თქმით, ,,მთავარის“ გენერალური დირექტორი პრეზიდენტთან მიმართებით სიტყვა ,,რეზიდენტს“ იყენებდა.
,,გაგახსენებთ, ნიკა გვარამია რა სიტყვებით მოიხსენიებდა საქართველოს პრეზიდენტს, მან სამი სიტყვა გამოიყენა. გაგახსენებთ პირველს, ეს იყო რეზიდენტი, მეორეს და მესამეს ეთიკური მოსაზრებიდან გამომდინარე არ გავიხსენებ. ამის შემდეგ როცა ვსაუბრობთ, რომ სალომე ზურაბიშვილმა შეიძლება, შეიწყალოს ნიკა გვარამია, გამოდის, რომ სალომე ზურაბიშვილი ოდნავადაც არ სცემს პატივს პრეზიდენტის ინსტიტუტს, ეს უნდა დავუშვათ. მგონი, ეს ასე არ იქნება, მინიმალური პატივისცემა მაინც იქნება გამოხატული პრეზიდენტის ინსტიტუტის მიმართ და ასეთ შემთხვევაში, გამოირიცხება შეწყალება“ _ აღნიშნავს კობახიძე.
თბილისის სააპელაციო სასამართლომ "მთავარი არხის" გენერალური დირექტორი და დამფუძნებელი ნიკა გვარამია პატიმრობაში დატოვა. გადაწყვეტილება მოსამართლეთა კოლეგიამ დღეს გამოაცხადა. საქალაქო სასამართლომ მას 3 წლითა და 6 თვით პატიმრობა 2022 წლის 16 მაისს შეუფარდა.
