ძალიან მნიშვნელოვანია, რომ რეიკიავიკის სამიტისთვის საქართველოს პოზიციები დამაჯერებლად და მყარად იქნას წარმოდგენილი. ამის შესახებ საქართველოს პარლამენტის თავმჯდომარის მოადგილემ, პარტია ,,მოქალაქეების“ ერთ-ერთმა ლიდერმა, ლევან იოსელიანმა განაცხადა, რომელიც სტრასბურგში ევროსაბჭოს საპარლამენტო ასამბლეის ზამთრის სესიაში იღებს მონაწილეობას.
რეიკიავიკის სამიტთან დაკავშირებული რეზოლუციის პროექტი, რომელშიც უკრაინასთან ერთად საქართველოც არის მოხსენიებული, იოსელიანის განცხადებით ძალიან მნიშვნელოვანია. როგორც დეპუტატი აღნიშნავს, ჩანაწერში ხაზგასმულია, რომ რუსეთის მიერ 2008 წელს საქართველოში განხორციელებული ფართომასშტაბიანი აგრესია და ტერიტორიების ოკუპაცია, საერთაშორისო სამართლის პრინციპების უხეში დარღვევაა.
,,ძალიან მნიშვნელოვანია, რომ რეიკიავიკის სამიტისთვის საქართველოს პოზიციები დამაჯერებლად და მყარად იქნას წარმოდგენილი. ამ თვალსაზრისით მიღებული რეზოლუცია და იქვე გაკეთებული დამატება, რომელიც კიდევ ერთხელ ხაზს უსვამს რუსეთის ფართომასშტაბიან აგრესიას 2008 წელს საქართველოში, არის მნიშვნელოვანი. უნდა გვახსოვდეს, რომ რა თქმა უნდა, უკრაინის საკითხი აქაც, სტრასბურგშიც არის და რეიკიავიკშიც იქნება მთავარი და წამყვანი საკითხი, მაგრამ სადაც არის უკრაინაზე საუბარი, უნდა იყოს საუბარი საქართველოზეც და არავის არ უნდა მივცეთ საშუალება, რომ დავიწყებას მიეცეს 2008 წელს საქართველოში რუსეთის მიერ განხორციელებული ფართომასშტაბიანი აგრესია. ეს ჩანაწერი მხარდაჭერილი იქნა რეზოლუციაში, რომელიც გუშინ მიიღო ევროსაბჭოს საპარლამენტო ასამბლეამ და რეიკიავიკის სამიტზეც რეზოლუცია ამ ჩანაწერით იქნება წარდგენილი“ _ განაცხადა ლევან იოსელიანმა.
