,,ვეტერანთა შესახებ კანონების თავმოყრა უნდა მოხდეს ერთ სამართლებრივ დოკუმენტში, რომელსაც ,,ვეტერანთა კოდექსი“ ერქმევა“. ,,მოქალაქეები“ ვეტერანთა კოდექსზე სამუშაო ჯგუფის შექმნის ინიციატივით გამოდის. როგორც პარტიის ლიდერი, თავდაცვისა და უშიშროების კომიტეტის წევრი, ალექსანდრე ელისაშვილი განმარტავს, ვეტერანებთან დაკავშირებით დღეს ქვეყანაში არსებული კანონები და ნორმატიული დოკუმენტები გაფანტული და ქაოტურია და ის ერთ სამართლებრივ ჩარჩოში თავმოყრას საჭიროებს.

ელისაშვილი მოუწოდებს როგორც ხელისუფლების, ისე ოპოზიციის წარმომადგენლებს და ასევე ყველა მსურველს, ჩაერთონ სამუშაო ჯგუფში, რომელსაც იგი თავად შექმნის.

,,ჩვენ ვიწყებთ მუშაობას ძალიან მნიშვნელოვან საკითხზე, ეს არის ვეტერანთა კოდექსი. გვინდა, რომ შეიქმნას საქართველოში პირველად ვეტერანთა კოდექსი და მოვუწოდებ ყველას აბსოლუტურად, როგორც მმართველი პარტიის წარმომადგენლებს, თავდაცვისა და უშიშროების კომიტეტის წევრებს, ასევე ჩემს ოპოზიციონერ კოლეგებს. მე ვქმნი სამუშაო ჯგუფს და ყველას ვპატიჟებ. ვეტერანების საკითხი უნდა იყოს ჩვენი სახელმწიფოს და საზოგადოების ღირსება, მათ სჭირდებათ დაფასება და მათი ღვაწლის დაფასების გამოხატულება იქნება სწორედ ვეტერანთა კოდექსის შემუშავება. ამის შესამუშავებლად სამუშაო პროცესის ერთობლივად წარმართვა და ყველას, ვინც არის პარლამენტში წარმოდგენილი და არა მხოლოდ მათ, ყველას ვუღებთ კარს და ვეპატიჟებით. ჩვენ არ გვაქვს ვეტერანთა კოდექსი, თუმცა ევროპის არაერთ ქვეყანაშია მსგავსი დოკუმენტი. მინდა განვმარტო, თუ რას გულისხმობს ის და რატომ არის ის საჭირო და აუცილებელი. ვეტერანების შესახებ გვაქვს გაფანტული კანონები, გაფანტული ნორმატიული დოკუმენტები, როგორც ვეტერანთა წესის მიღების შესახებ, რომელიც ხარვეზიანია, ხშირ შემთხვევაში ვეტერანები დაფასების ნაცვლად აწყდებიან პრობლემებს, ასევე სოციალური პაკეტი, ჯანდაცვის პაკეტი, ეს ყველაფერი გაფანტულია, არის ქაოტური, არეულ-დარეული, არასწორი დაბეგვრის რეჟიმი მუშაობს, ასევე განათლების ნაწილშიც ხელშეწყობა უნდა ამ ადამიანებს. მინდა, რომ მოხდეს ამ ყველაფრის ერთ სამართლებრივ სივრცეში, ერთ კოდექსში თავმოყრა. ეს იქნება სახელმწიფოს მხრიდან დამოკიდებულების გამოხატვა ვეტერანებისადმი, იმ ხალხისადმი, რომლებსაც აქვთ ძალიან დიდი დამსახურება ჩვენი ქვეყნის მიმართ და სწორედ ამ ადამიანების დამსახურებაა, რომ ჯერ კიდევ ვარსებობთ როგორც ქვეყანა და სახელმწიფო.

ასევე, რომ ავიღოთ ჩანაწერი ვეტერანთა შესახებ, არიან ბიჭები, მეომრები, რომლებიც 2008 წელს იბრძოდნენ, უამრავი თვითმხილველი ჰყავს მათ ბრძოლას, მაგრამ ისინი ვერ ასაბუთებენ, რომ არიან ვეტერანები. ასეთია, მაგალითად ფინანსთა სამინისტროს ფინანსური სპეცრაზმის ბიჭები, რომლებიც ზეპირი ბრძანების საფუძველზე შეიყვანეს იქ. ისინი იბრძოდნენ, არაერთმა მათგანმა ჭრილობა მიიღო, დანაკარგი არ ჰქონია ამ ქვედანაყოფს, მაგრამ იბრძოდნენ და ბევრი მათგანი დაიჭრა. სახელმწიფო კი ეუბნება მათ, რომ ისინი არ არიან ვეტერანები და არ იმსახურებენ ვეტერანობას. ახლა მე ვცდილობ, მათ დავეხმარო. ანალოგიური შემთხვევა იყო იუსტიციის სამინისტროს სასჯელაღსრულების სპეცრაზმთან, რომელიც ასევე ზეპირი ბრძანების საფუძველზე შევიდა სამაჩაბლოში და იბრძოდნენ. სახელმწიფომ მათაც უარი, უთხრა, მაგრამ სასამართლოს გზით დაასაბუთეს. გარდა ამისა, სოციალური და საშეღავათო პირობები არის აბსურდული. მაგალითად, თბილისში მცხოვრები ვეტერანები სარგებლობენ თბილისის საზოგადოებრივი ტრანსპორტით უფასოდ, მაგრამ მცხეთელი, ბათუმელი, ყვარლელი ვეტერანი ვერ სარგებლობს თბილისში საზოგადოებრივი ტრანსპორტით უფასოდ, და პირიქით, თბილისელი ვეტერანი თბილისის გარდა ვერსად სარგებლობს უფასო ტრანსპორტით. ეს როგორი აბსურდია ხომ წარმოგიდგენიათ? ვეტერანი ხომ არ არის ლოკალურად რომელიმე რეგიონის ვეტერანი, ის საქართველოს თავდაცვის და შეიარაღებული ძალების ვეტერანია. ამიტომ მსგავსი აბსურდები უნდა მოიხსნას. გარდა ამისა, ამავე კოდექსის ფარგლებში უნდა მოვითხოვოთ, რომ ვინც იბრძვის უკრაინაში უკრაინელთა მხარეს, ამ ბიჭებმაც უნდა მიიღონ ვეტერანობა, თუ ეს სტატუსი მანამდე არ ჰქონდათ, რადგან ისინიც საქართველოსთვის იბრძვიან. ასეთი საკითხების მოწესრიგება და თავმოყრა უნდა მოხდეს ერთ სამართლებრივ დოკუმენტში, რომელსაც ,,ვეტერანთა კოდექსი“ ერქმევა“ _ განაცხადა ალექსანდრე ელისაშვილმა.